أحمد سعد يطمئن جمهوره بعد تعرضه لحادث سير ويكشف تفاصيل حالته الصحية

طمأن الفنان أحمد سعد جمهوره على صحته بعد تعرضه لحادث سير كبير، خلال مداخلة هاتفية مع الإعلامي عمرو أديب في برنامجه "الحكاية"، مؤكداً أنه بخير وبفضل حب ودعم الجمهور يشعر بسعادة كبيرة.

وقال سعد: "الحمد لله في نعمة والنعمة الأكبر حب الناس اللي شفته، حاجة بصراحة يعني مش قادر أقول إيه، بشكر كل الناس حبايبي وأصحابي وجمهوري وكل الناس اللي وقفت جنبي وقالت كلام حلو، أنا سعيد جدًا، الناس فعلاً بيبان حقيقتهم في الشدة".

وأضاف أنه سيقضي فترة راحة في المستشفى حسب تعليمات الأطباء: "الدكاترة بتقول لازم أقعد 5 أيام في المستشفى بس أنا بقول يومين لأن الواحد دكتور نفسه، بس كل الحفلات والأفراح اتأجلت لأني عندي مشكلة في المشي، والدكاترة قالوا الكسر اللي في الفقرات مش محتاج جراحة لكن محتاج راحة تامة".

وأكمل أحمد سعد: "أنا بطمن الناس وبقولهم الحمد لله كويس وفي نعمة كبيرة، منبصش على الحاجة الوحشة إني حصلي حادثة نبص إني طلعت منها كويس الحمد لله ربنا فداني، بشكر ربنا وبحمد ربنا، وبقول للجمهور إني موجود ويوم الجمعة الجاية إن شاء الله يكون عندي حفلة، آه مش هتنطط بس هشوف الناس".

وكان شقيقه الفنان عمرو سعد قد أعلن عن الحادث عبر صفحته على Facebook قائلاً: "أحمد سعد إن شاء الله هيكون بخير بعد تعرضه لحادث سير صعب، قدر الله وما شاء فعل، دعواتكم لينا".